Document d'archives : Original scellé
5618 - Lyon. 1269-70. 22 janvier.
Accord entre les chapitres de Saint-Jean et de Saint-Just de Lyon et les...

Institution de conservation :

Archives nationales

title_label

Original scellé
5618 - Lyon. 1269-70. 22 janvier.
Accord entre les chapitres de Saint-Jean et de Saint-Just de Lyon et les bourgeois de cette ville pour l'établissement d'un arbitrage .
Nos frere Yves, par la grace de Deu abbes de Cluiny, et nos Jehanz de Cranes, chevaliers le rey de France, et nos Henriz de Gaudonviler, chevaliers, bailliz de Borges, à toz ceuz qui verront ces presentes letres salut en Nostre Seignor. Nos vos fesons saveir que nos devant dit frere Yves, abbes de Cluiny, de part honorable pere Rau, par la grace de Deu evesques d'Albane, legaz de part l'eglise de Rome, et de l'asentement mon seignor Loys, rey de France, et nos devant diz Jehanz de Cranes et Henrys de Gaudonviler, bailliz de Burges, de part lo devant dit rey de France envoiez es parties de Lion por treter et por metre pes et acorde ou contenz qui est entre lo dean et lo chapitre de Sain Jehan et le chapitre de Sain Just de Lion, d'une part, et les citeans et le pople de Lion, d'autre, nos sumes entremis de metre pes et acorde entre les parties devant dites, et à la parfin nos avons mis entre les dites parties tel acort : c'est à saveir que li deans et li chapitres de Sain Jehan et li chapitres de Sain Just et li citeans et li poples de Lion devant diz ont fete mise de totes lor quereles et de toz lor descorz sus le legat et sus le rey de France, haut et bas, à lor volonté o par acort, de l'asentement des parties par droit, sauf que tant que li devant diz deans et li chapitres de Sain Jehan vuelent et requerent que les noveletez que li citean et li poples [de Lion] ont fetez si com li deans et li chapitres de Sain Jehan dient, soient ostez avant tote ovre. Les queuz noveletez sunt teuz que il sunt desaisi de lor cloistre, de lor meisons, de la jurisdicion de la vile de Lion, qui apartient à l'eglise de Sain Jehan, et ponz, fossez, barres, torz, chaffauz, portes, cheines et autres chosez fetez de novel, les queuz chosez, si com li deans et li chapitres de Sain Jehan dient, sunt manifestez à l'oil, et sunt manifestes par les sentences, qui sunt donéez de l'evesque d'Oston, ordinares de Lion lo sege vacant, et par la confirmacion fete de l'autorité du dit legat, et par les sentences donéez du concile provincial. Por quai dient li devant diz deans et li chapitres de Sain Jehan que teles chosez desus ditez ne deivent venir en mise ne en nule dote, einz deivent estre ostéez devant tote ovre, maimement com il ont offert pluisors foiz et ofrent au diz citeans et pople de Lion, qui sunt justisable à l'eglise de Sain Jehan, si com il dient, qu'il lor donront cort sanz suspition de totes quereles ; nequedant si au legat ne au rey est avis qu'il deivent plus fere, il sunt apareillié du fere à lor conseil et à lor volonté, lors resons oyes. Et li devant dit citean et li pople de Lion ont offert à croire lo legat et lo rey de toz contenz et de totes chosez qui sunt por reson du contenz, et s'il veoient qu'il deivent plus fere, il sunt apareillié de fere à lor conseil et lor volonté, lor resons oyes ; et de cez chosez desus ditez atendre, parsegre, acomplir et garder sorlon (sic ) la forme desus mise, li diz deans et li chapitres de Sain Jehan et li chapitres de Sain Just, c'est à saveir Miles de Vauz, deans, Peres d'Auste archideaquenes, Guillaumes de la Poipe, precentre, Chatarz li chantres, Ugos de Turnon, segresteins, Guillemos li custodes, Theanz, Guis de Tyert, Durgenz, Guillaumes Buchy, Guicherz de Farnay, Garins et Guicherz de Sain Zçaphurin, Estevenz de Chandeu, Peres Mareschauz, Ugos de Sain Germain et Ugos de Piseiz, chanoine de Sain Jehan de Lion, ac (sic ) Boes de Longes, Estevenz Caras, Raolz, Bartholomeuz Tardiz, Dinisez de Satoignins et Estevenz Caras li jones et Guillaumes de Riom, chanoine de Sain Just, ont juré sus saint evangile et ont obligé toz lors biens et les biens de lor chapitres, mobles et non mobles, quelque part qu'il soient, et en ont baillié letres seellez des seeuz des diz chapitres de Sain Jehan et de Sain Just. Ansiment li citean et li pople de Lion ont juré sor sainz evangiles à atendre, parsegre, acomplir et garder les chosez desus dites sorlon la forme desus devisée, et ont obligé toz lors biens, mobles et non mobles, quelque part qu'il soient. Parmi toz ce les dites parties ont doné apessement li uns as autres d'euz et de lors aidors, nomeement du conte de Foreis devers lo dean et devers les chapitres, et nomeement de Ugon de la Tor, seschal de Lion, et de Umbert de la Tor, son frere, devers les citeans et lo pople, jusqu'à Careimentrant le viel ; et cest apessement li deans et li chanoine de Sain Jehan et de Sain Just desus nomé ont juré sus saint evangile à tenir et garder bonement et leaument, et en ont doné plege le conte de Foreis, li queuz est entré por euz en la dite plegerie et a juré sus sainz evangiles l'apessement garder bonement et leaument por soi et por les suens. Et ansiment li citean et li pople de Lion ont juré sor saint evangile à tenir et garder bonement et leaument lo dit apessement, et ont doné pleges de ceste chose Ugon seschal de Lion, Umbert de la Tor, frere, et Umbert sire de Monluel, Matheu de Fuer de la Paneterie, Bernerz de Chaponnay, Jehanz de Chaponnay, Bartholomeuz de Chaponnay, Jehanz de Varey, Peres de Varey, Bertholomeuz de Varey, Bernerz de Varey, Matheuz de la Mura, Thomas de Varey, Roulez de Varey, Umberz de Varey, Duranz de Fuer, Bartholomeuz de Fuer, Peres de Sain Valer, Raymonz Filatres, Estevenz del Curtil, Poinz Talbon, Ugos de Fuer, Jehanz de Sancher, Estevenz d'Anzia, Peres d'Anzia, Peres de Chalens, G. Bonniardi, P. Bonniardi, Estevenz Eudin, Estevenz de Sain Michiel, P. Raymonz, J. de Lion, Estevenz li Reidos, G. Blanc, P. Blanc, André Raffin, Bertholomeuz de la ... de Rochetaillie, Peronez de Chaponnay, Guionez de la Mura, Jaquemez Alamanz, Peronez de la Clusa, Th. Desde, G. Desde, P. et G. Boers, Umberz Lengleis, P... ossin, J. Farsiz, P. de Varey, Badel, Ay. de Vienna, J. Gays, Ay. Cornavin, P. de Meons, Nicholas de Conches, Guilloz del Pont, J. de Durchi, J. de Durchi son niés, J. de Fuer, Bernerz Malens, Girerz Alamanz, Nicholas Bo, J. Vendranz, P. de Nevro, Falconez del Puis, P. Do, Umberz le Douiens, P. de Vauz, G. Gregneuz, P. de Vienna, Jehanz de Losanna, Umbert de Durchi, Ugos Peleter, G. Peleter, Sofreis Girouz, Lorenz del Alben, P. Bermonz, Umberz Chapel, Nisiez del Alben, Martinz Evrarz, Martinz Lombarz, P. Ros, Ay. Varissons, P. Acharie, Poinz de Floireu, Umberz Fusters, J. de Foreis, S. Lyatarz, citean de Lion, li quel sunt entré en la dite plegerie et ont juré sus sainz evangiles lo dit apessement garder bonement et leaument por euz et por les lor. Parmi toz ce li dit citean et le pople ont doné letres seellez dou seel l'evesque de Clermont et dou seel le bailli de Mascon, de garder l'apessement ensi com il est desus devisé. Et est acordé entre les parties desus dites que li prison qui sunt pris d'une part et d'autre serront mis en la mein lo legat et lo rey por delivrer o por fere lor volonté. En tesmoing de cez chosez nos frere Yves, abbes de Cluiny, Jehanz de Cranes et Henriz de Gaudonviler desus només, qui avons esté present à cest acort, avons mis nos seeuz de la volonté et par la requeste des ditez parties en cez letres. - Ce fut fet et doné à Lion, lo jor de feste Sain Vincent, en l'an de Nostre Seignor M. CC. sessante et nef.

Contenu :

Cette pièce, usée et détériorée en plusieurs endroits, a été scellée, sur doubles queues, de trois sceaux, dont un seul existe encore, à droite :
Sceau de Henri de Gaudonvillers (Inventaire, n° 5090).
Cf. Ménestrier,Hist. de Lyon, 2e partie, preuves, p. 3, col. 1.

Identifiant de l'unité documentaire :

J//148-J//735 - J//262
    • Original scellé | 5618 - Lyon. 1269-70. 22 janvier. | Accord entre les chapitres de Saint-Jean et de Saint-Just de Lyon et les bourgeois de cette ville pour l'établissement d'un arbitrage . | Nos frere Yves, par la grace de Deu...