Document d'archives : Original
5472 - Vers 1268.
2.Déposition du sire de Choiseul en réponse aux plaintes du comte de Bar .
C'est la response que...

Institution de conservation :

Archives nationales

title_label

Original
5472 - Vers 1268.
2.Déposition du sire de Choiseul en réponse aux plaintes du comte de Bar .
C'est la response que li sires de Choisuel fait par son sairement à la demande le conte de Bar.
A ce que li cuens de Bar dit que li sires de Choisuel est ses hons liges respont li sires de Choisuel qu'il ne le croit pas, et dit qu'il est hons liges l'evesque de Laingres et le conte de Borgoigne devant lui, mais il conoist bien qu'il estoit ses hons de fié avant que li cuens mespreist vers lui.
A ce que li cuens dit que il ocist Warnet le fil Orry de Tous, dit li sires de Choisuel qu'il n'est pas tenus au respondre, car d'ocisiom d'ome, si com il la propose, ne de l'onor de som cors ne s'est il pas mis an mise, ne tex cas ne chiet pas ne ne doit pas estre selonc droit an cause d'arbitre, et se plus i aferoit ou drois le disoit qu'il i deust respondre, se retient il à dire et à faire tant qu'il l'an deliverroit.
A ce que li cuens dit que li sires de Choisuel prea et brisa ses villes desouz dites, c'est à savoir Grefignei, Chemin, Lonchanp et brisa la Marche, Orellie Maisom, et ardi et preai, et corrut devant la Mouthe et en menai grant partie de proie, respont li sires de Choisuel qu'il croit bien qu'il i fu, cum cil qui le pout faire et dut selonc la costume dou païs, car li cuens de Bar, sans ce que li sires de Choisuel n'avoit mespris vers li, ne n'estoit defaillanz de droit, li avoit devant et à tort abatue Doncort sa maisom, et rompuz ses fosseis et ses estanz, et decopés ses jardins et sa grange abatue, et plusors autres domaiges faiz qu'il offre bien à proveir.
A ce que li cuens dit qu'il le fit ajorneir, respont li sires de Choisuel que II chevalier vinrent à lui, et li distrent : "Sire, li cuens de Bar vous fait ajorneir, et le vous disons de par lui que vous soiés d'ier an quinze jors, ou d'ui an quinze jors, ou de demain an quinze jors par devant lui." Et à ce respondi il as ajorneors que li cuens li avoit abatue sa maisom et faiz ses damaiges desus diz et à tort, et se il le voloit aseureir droit faisant et restaublir ses damaiges, il estoit pres d'aleir par devant lui et de faire droit tant com il devoit.
A ce que li cuens dit qu'il avoit saisiz ses fiez que li sires de Choisuel tenoit de lui, respont il qu'il n'i puet ne ne doit respondre certainemant, car la peticions est oscure an ce qu'il dit ses fiés, et ne les nome pas ; dont il requiert an quel leu et quex fiés il ai saisiz, si com il dit, que om li declaire, et il li respondrai si com il devrai.
A ce que li cuens dit que li sires de Choisuel se mit an trieves vers lui, respont li sires de Choisuel que an trieves fui il ausi, com il le monsterrai par ses lestres qu'il an ai de lui.
A ce que il dit qu'il le guerroiai à tort an preant et ardant ses villes, respont il que il croit bien qu'il i fui ou ses gens, come cil qui faire le pooit selonc la costume dou païs, car li cuens li avoit abatue sa maisom devant ce, et i faiz autres domaiges et à tort, si com il est desus dit, et estoit an droite guerre.
As damaiges que li cuens dit et demande au signor de Choisuel por lui et por autrui ne viaut pas respondre li sires de Choisuel, car la peticions est oscure, por ce que il ne dit pas quex damaiges ne an quel leu, et an l'oscure peticiom certainne response ne puet estre faite, dont il requiert que om li desclaire avant que il responde.
As fiés que li cuens de Bar requiert que om li delivroit, et ne dit quex, n'est pas tenus ( ?) li rois, car la peticions est oscure, si con il est desus dit, par quoi li sires de Choisuel ne puet respondre, et se il i ai aucune chouse où il afiere prueve, li sires de Choisuel l'ouffre à proveir par bones gens, si con il devrai, tout ou partie, ou tant que il li soufise à ataindre s'antanciom.

Contenu :

Scellé autrefois sur simple queue ; l'attache et le sceau n'existent plus. Au dos, de la même main : "Ce sunt les responses as demandes le conte."

Identifiant de l'unité documentaire :

J//148-J//735 - J//582
    • Original | 5472 - Vers 1268. | 2.Déposition du sire de Choiseul en réponse aux plaintes du comte de Bar . | C'est la response que li sires de Choisuel fait par son sairement à la demande le conte de Bar. | A ce que li cuens de...