Document d'archives : Original scellé
5708 - 1270. Jeudi 26 juin.
Pierre de la Fauche amoisonne diverses terres à Érard de Vallery .
Je Pieres,...

Institution de conservation :

Archives nationales

title_label

Original scellé
5708 - 1270. Jeudi 26 juin.
Pierre de la Fauche amoisonne diverses terres à Érard de Vallery .
Je Pieres, sires de la Fauche, chevaliers, fais à savoir à touz ces qui verront et orront ces presentes lettres que je ai amoisoné et en non d'amoisonement laisié et otrié à mon signor Erart, signor de Valeri, chevalier et cognoistable de Champaigne, toute ma terre que je ai à Cervel, à Boilly, à Laines Boureuses et à Baire de lez Troies, et touz mes hommes que je ai à Troies et aillors des apartenances et des appendances des villes davant dites, et tout quanque je ai et taig par quelque droit que ce soit es leus et es villes desus nommées, an hommes, an tailles, an terres arables, an prez, an cens, an costumes, an corvées, an rentes, an fiez et en toutes choses quelconques qu'eles soient, la quel terre et les queles choses li diz Erars mes sires m'a données, à tenir et à avoir ou non de moison de ce mon signor Erart mon signor, tant cum il vivra, pour le pris et pour la somme de cent livres de tornois que le diz Erarz mes sires me rendra chascun an tant cum il vivra, ou à mon commandement, à la feste Saint Remi ou chief de octobre. Et promet que contre cest amoisonement par moi ne par autrui ne venra ne ne fera venir tant cum li diz Erarz mes sires vivra. Et est à savoir que je voil et otroi et promet que, tant cum li diz Erarz mes sires vivra, je ne vendra, ne ne donra, ne alienera, ne ne metrai hors de ma main la dite terre ne les choses desuis nommées. ne ne fera chose par que li diz Erarz mes sires ne demoroit en la dite moison. Et en tesmoignaige de ceste chose je ai mis mon seel en ces presentes lettres, qui furent donées en l'an de grace M. CC. LXX, le jeudi après la feste de la Nativité Saint Jehan Baptiste.

Contenu :

Scellé en cire verte, et sur double queue, du sceau de Pierre de la Fauche (Inventaire, n° 2135).

Identifiant de l'unité documentaire :

J//148-J//735 - J//208
    • Original scellé | 5708 - 1270. Jeudi 26 juin. | Pierre de la Fauche amoisonne diverses terres à Érard de Vallery . | Je Pieres, sires de la Fauche, chevaliers, fais à savoir à touz ces qui verront et orront ces presentes lettres...